ГУДЫРИКОШКОН (АВГУСТ)

12-ти гудырикошкон –егитъёслэн калыккуспо нуналзы. 1998 арын гудырикошкон толэзе Лиссабонын ортчиз дуннеысь егитъёсын ужанъя министръёслэн конференцизы. Люкаськемъёс вераськизы егитъёслэн луонлыкъёссы, нимысьтыз кылдытэм программаослэн ужамзы сярысь. Статистикалэн верамезъя, дуннеын 3 миллиард пала 25 аресозь егитъёс. Жыны миллиардэз соос полысь куанеръёс полы пыро. Нуналлы быдэ ог 7 сюрс егит адямиос СПИД черен висьыны кутско. ООН- ысь онерчиос куризы – та шуг-секытъёсты палэнтон понна огазьын ужано, егитъёс полын валэктон ужъёс нуоно. Егитъёслэсь калыккуспо нуналзэс нырысьсэ 2000 арын пусйизы.

21-ти гудырикошкон 2008 ар – Yumshan Promo но Нациосын ужанъя политикая министерство ортчытизы лымшор но уйпал удмуртъёс куспын нырысети удмурт футбол. Шудизы «Бенъёс» но «Бонъёс» командаос. Табере та шудон зеч сямлы порме: 2009 арын но уйпал но лымшор пиос кужымзэс мертазы футбол бусыын. …Шаплы бызьыло шудисьёс. Туп бусылэн огпалысьтыз мукет палаз лобе. Капкаос дорын пось нюръяськон мынэ. Но капка возьмасьёс – Кун Думаысь депутат Николай Мусалимов но «Мынам Удмуртие» радиоысь корреспондент Александр Бикузин – сак уло. Озьы ке но лымшор палась Вадим Михайловлы удалтиз нырысети гол пыртыны. Бугырскизы учкисьёс. Шудон эшшо но пуромиз. Тани, зэмос Марадона сямен, тупсэ «бонъёслэн» капказы пала нуэ Павел Поздеев, сьорысьтыз уг кыльы Дмитрий Загребин. Жадёнэз валатэк, лоба «бонъёслэн» капитанзы Роман Романов. – Эх, –лулзылэ шоразы учкыса Светлана Кибардина, –тамында чебер пиос, туп сьоры калтыртытозь, нылъёс сьоры бызьылэ вал. Со куспын «бонъёс» эшшо гол пыртизы. «Бенъёслы» уг удалты – зеч возьмаське Александр Бикузин. – Киыз клеен зырамын, дыр, – куспазы серекъяло висисьёс. Туплэн лымшоръёслэн капкаязы пыремез уг поты – я штанга борды шуккиське, я Алнаш палась тол сое палэнэ нуэ. «Бонъёс» вормизы 6:0 лыдын… (Образцова Н. Удмурт футбол // Инвожо. № 9–10. 2008 ар)

1-ти гудырикошкон 1993 ар – Глаз ёросын кылдиз инбам улысь «Иднакар» музей.

 2-ти гудырикошкон 1999 ар – кутскиз 2-тиез чечен ож.

2-ти гудырикошкон 1918 ар – удмурт калык учкиз нырысетизэ анай кылын спектакль. Глаз уездысь Ягошур гуртысь дышетись – А. Н. Ураснова –берыктиз Л. Н. Толстойлэсь «От неё все качества» комедизэ но сое сцена вылын пуктиз.

 2-3-ти гудырикошкон 2008 ар – "АРТАНА" ялкарон базаын "ВЫЛЬ" праздниклы сӥзем шулдыръяськон ортчиз.

3-8-ти гудырикошкон 2003 ар – «Шунды» огазеяськон гуртын улись егит семьяос понна нырысетизэ «Шудо семья» лагерь радъяз.

 5-ти гудырикошкон 2007 ар – усьтиськиз выльдэм Св. Михайловский Собор

 8-ти гудырикошкон – вордскем нуналзэ пусъе удмурт ужрадъёсты нуись Ольга Угланова (1988).

8-ти гудырикошкон – вордскем нуналзэ пусъе удмурт егит кылбурчи Богдан Анфиногенов (1990).

9-14-ти гудырикошкон 2006 ар – Ижкарын ортчизы гужем шудонъёсъя 6-тиез России гурт чошатсконъёс.

 11-ти гудырикошкон 2009 ар – Москваысь удмурт егитъёслэн огазеяськонзылы «МУШ» ним сётэмын.

12-ти гудырикошкон 2000 ар – Баренцево зарезе выйиз ву улын ветлись «Курск» лодка. Бырыны шедизы 118 онерчиос но армиын служба нуись егитъёс.

 15-ти гудырикошкон – вордскем нуналзэ пусъе Дарали Лели.

 15-18-ти гудырикошкон 2005 ар – ортчытэмын этнофутуризмъя калыккуспо «Артана» фестиваль. 

 18-ти гудырикошкон 1929 ар – Дэбес ёросысь Ягвуко гуртын вордскиз крезьгурчи, кырзась, Россиысь искусство удысысь дано ужась, Удмуртиысь калык артист Геннадий Корепанов-Камский.

  19-ти гудырикошкон – вордскем нуналзэ пусъе егит кырзась Юлия Никитина

 20-ти гудырикошкон 1938 ар – кылдиз Удмурт кун филармония

22-ти гудырикошкон 1991 ар – Москваысь Правительстволэн юртэз вадьсын жутскиз тодьы-лыз-горд куншет – гордэз интые. Россилэн кун флагезлэн нуналыз

 24-26-ти гудырикошкон 2006 ар – «Культура России» федерал программа улсын шаерамы ортчиз 3-тиез финн-угор калыкъёслэн «Воршуд» фестивальзы. Со сиземын вал калык эктонъёслы.

 29-ти гудырикошкон 2009 ар – Удмурт театр шаерысьтымы егитъёсты лэзиз Москвае Щепкин нимо училищее артистлы дышетскыны